కాసేపట్లో డిగ్రీ పరీక్ష.. ఆన్‌లైన్‌లో ప్రశ్నాప్రత్నం.. తిరుపతిలో తీవ్ర కలకలం!

కాసేపట్లో పరీక్ష జరుగుతుందనగా.. ఆన్‌లైన్‌లో ప్రశ్నాపత్రం లీక్ కావడం తీవ్ర కలకలం రేపింది. చిత్తూరు జిల్లా తిరుపతిలోని శ్రీవేంకటేశ్వర యూనివర్సిటీ పరిధిలో డిగ్రీ ప్రశ్నా పత్రం లీకేజీ వ్యవహారం సంచలనం రేపుతోంది. చిత్తూరు జిల్లాలోని మదనపల్లెలో బీకామ్ ఆరో సెమిస్టర్‌ అకౌంట్స్‌ మేనేజింగ్‌ అకౌంటింగ్‌ పరీక్ష ప్రశ్నా పత్రం లీకైంది. బుధవారం మధ్యాహ్నం 2 గంటల నుంచి సాయంత్రం 5 గంటల వరకు డిగ్రీ మేనేజింగ్‌ అకౌంటింగ్‌ పరీక్ష జరగాల్సి ఉంది. బుధవారం ఉదయం 11.42 గంటలకే లీకైన ప్రశ్నా పత్రం లీక్ కావడంతో.. సోషల్ మీడియాలో వైరల్‌ అయింది. దీంతో తీవ్ర కలకలం రేగింది. దీనిపై విచారణ జరిపించాలని విద్యార్థి నాయకులు డిమాండ్ చేశారు. కాగా, ఈ నెల 23 నుంచి ఎస్‌వీయూ పరిధిలో డిగ్రీ పరీక్షలు ప్రారంభమయ్యాయి. వర్సిటీ పరిధిలోని 112 కళాశాలల్లో పరీక్షలు జరుగుతుండగా.. 73 వేల మంది డిగ్రీ విద్యార్థులు పరీక్షలు రాస్తున్నారు. వారిలో 25 వేల మంది చివరి సంవత్సరం పరీక్షలు రాస్తున్నారు. కాగా, డిగ్రీ ఆరో సెమిస్టర్ పరీక్షలకు సంబంధించి బి.కామ్ విద్యార్థులకు జరగాల్సిన అకౌంటింగ్ అండ్ మేనేజ్మెంట్ పేపర్ సోషల్ మీడియాలో లీక్ కావడం ఎస్వీయూ అధికారుల డొల్లతనానికి నిదర్శనమని ఎస్ఎఫ్ఐ జిల్లా ప్రధాన కార్యదర్శి ఎన్. మాధవ్ పేర్కొన్నారు. ఈ ఘటనలో మదనపల్లి పట్టణంలోని ఓ కళాశాల పాత్ర ప్రత్యక్షంగా బయటపడిందని, తక్షణమే అధికారులు స్పందించి చర్యలు తీసుకోవాలని డిమాండ్ చేశారు. అధికారులు ఈ విషయంలో అలసత్వం వహిస్తే యూనివర్శిటీ పరిపాలన భవనం ముట్టడి చేస్తామని పత్రిక ప్రకటనలో హెచ్చరించారు.