తూ.గో: ఒక్క లేఖతో, అధికారులను పరుగులు పెట్టించిన సర్పంచ్.. ఇదీ పవర్ అంటే..!

గ్రామ మొదటి పౌరురాలిగా ఆమె ఆధికారుల చుట్టూ తిరిగారు. తమ గ్రామంలో రోడ్లపై తిరిగే పరిస్థితి లేదని, వెంటనే మరమ్మతులు చేయాలని అధికారులకు ఎన్నో వినతులు చేశారు. కానీ, ఎవరూ రియాక్ట్ కాలేదు. చివరికి, సర్పంచ్ చేసిన పని అధికారులతో పరుగులు పెట్టించేలా చేసింది. ఎక్కడి నుంచి ఆదేశాలు రావాలో, అక్కడి నుంచే గట్టి రియాక్షన్ రావడంతో ఆఘమేఘాలపై ఊరికి చేరుకున్న అధికారులు మరోసారి ఇలా జరగనీయమని చెప్పి హామీ ఇచ్చారు. వెంటనే రోడ్లుకు మరమ్మతులు చేయిస్తామని చెప్పారు. ఇంతకీ ఏం జరిగిదంటే..? జిల్లా పి.గన్నవరం మండలం, గంటి పెదపూడి నుంచి గన్నవరం వరకు రోడ్లు వేయాలని బెల్లంపూడి సర్పంచ్ బండి మహాలక్ష్మి అధికారులను పలుమార్లు కోరారు. ఈ మార్గంలోని రోడ్లు అధ్వానంగా తయారయ్యాయని.. గుంతల వల్ల తరచుగా ప్రమాదాలు జరుగుతున్నాయని ఆందోళన వ్యక్తం చేశారు. కానీ, అధికారుల నుంచి ఎలాంటి సమాధానం రాకపోవడంతో సర్పంచ్ మహాలక్ష్మి కీలక నిర్ణయం తీసుకున్నారు. రోడ్డు సమస్యపై ఏకంగా ముఖ్యమంత్రి వైఎస్ జగన్మోహన్ రెడ్డికి లేఖ రాశారు. పరిస్థితిని వివరించారు. రోడ్లు గుంతలతో నిండి ఉన్నాయని.. రహదారిపై ప్రయాణించే ప్రయాణీకులకు ఇబ్బందులు పడుతున్నారని వివరించారు. ఈ రోడ్లపై తరచుగా యాక్సిడెంట్స్ జరుగుతున్నాయిని, తక్షణమే మరమ్మతులకు చర్యలు తీసుకోవాలని లేఖలో సీఎం జగన్‌కు వివరించారు. ఈ లేఖపై వెంటనే సీఎం కార్యాలయం స్పందించింది. రోడ్ల మరమ్మత్తులకు కావాల్సిన నిధులను రిలీజ్ చేసింది. దీంతో అధికారులు వెంటనే ఆ గ్రామం బాటపట్టారు. పి.గన్నవరం నుంచి గంటి పెద పూడి వరకు వెళ్లే రహదారి మరమ్మతులను అధికారులు చేపట్టారు. త్వరలోనే టెండర్లు వేసి రోడ్లు నిర్మిస్తామని సర్పంచ్ మహాలక్ష్మికి అధికారులు తెలిపారు. సర్పంచ్ చేసిన పనికి గ్రామ ప్రజల్లో హర్షాతిరేకాలు వ్యక్తమవుతున్నాయి. పలువురు సర్పంచ్ మహాలక్ష్మిని అభినందించారు.