మాజీ మంత్రి కేసు దర్యాప్తు విషయాన్ని హైకోర్టుకు నివేదించింది. చట్ట ప్రకారమే దర్యాప్తు చేస్తున్నామని.. హైకోర్టును తప్పుదోవ పట్టించి తమ దర్యాప్తునకు ఆటంకం కలిగించడమే పిటిషనర్ల ఉద్దేశమంటోంది. వివేకా హత్య కేసులో పిటిషనర్లు సునీల్ యాదవ్, అతని సోదరుడు కిరణ్‌ యాదవ్‌ల పాత్రను కొట్టిపారేయలేమని సీబీఐ అంటోంది. వారిద్దరు దాఖలు చేసిన పిటిషన్లకు సీబీఐ డీఎస్పీ దీపక్‌ గౌర్‌ కౌంటర్‌ దాఖలు చేశారు.. అందులో కీలక అంశాలను ప్రస్తావించారు. హైకోర్టు ఆదేశాల మేరకు వైఎస్‌ వివేకానందరెడ్డి హత్య కేసు దర్యాప్తు చేపట్టామని సీబీఐ కౌంటర్‌లో పేర్కొంది. కేసు దర్యాప్తు కీలక దశలో ఉందని.. కఠినమైన చట్టం నుంచి తప్పించుకునేందుకు పిటిషనర్లు ఈ పిటిషన్ దాఖలు చేశారన్నారు. పిటిషనర్లు చెబుతున్నవన్నీ నిరాధారమైనవని.. రాష్ట్ర పోలీసులు క్లీన్‌చిట్‌ ఇవ్వలేదు అన్నారు. ఈ కేసులో పిటిషనర్ల పాత్రను తోసిపుచ్చలేమని.. పిటిషనర్‌ను ఢిల్లీ సీబీఐ కార్యాలయంలో విచారణ చేసినంత కాలం అతను ఢిల్లీలోని తన బంధువు ఇంట్లో ఉన్నారన్నారు. ఈ కేసులో కొన్ని కీలక ఆధారాలు ఉన్నాయన్నారు. ఈ హత్యకు ముందు, ఆ తర్వాత సునీల్ యాదవ్ ప్రవర్తన, నడవడిక అనుమానాస్పదంగా ఉన్నట్లు దర్యాప్తులో తేలిందన్నారు. ఆధారాలను ప్రస్తుతం బయట పెట్టలేమని.. ఈ పిటిషన్‌కు విచారణ అర్హతే లేదన్నారు. పిటిషనర్‌ ఆమోదంతో అతడికి సంబంధించిన ఈ మెయిల్‌ ఐడీ, ఫేస్‌ బుక్‌ ఖాతాలను, అతని చేతి రాత నమూనాలను పరిశీలించామన్నారు. సునీల్ యాదవ్ అంగీకారంతో ఢిల్లీలోని సెంట్రల్‌ ఫోరెన్సిక్‌ ల్యాబ్‌లో అతనికి సైకలాజికల్‌ అసెస్‌మెంట్, వాయిస్‌ లేయర్డ్‌ అనాలసిస్‌ నిర్వహించామన్నారు.. థర్డ్‌ డిగ్రీ ప్రయోగించలేదన్నారు. వివేకా హత్య కేసులో సీబీఐ అధికారులు తమను ఇరికించేందుకు ప్రయత్నిస్తున్నారని కడప జిల్లా మోతునూతలపల్లికి చెందిన సునీల్ కుమార్ యాదవ్, అతడి సోదరుడు, తల్లిదండ్రులు హైకోర్టును ఆశ్రయించారు. తమను ఇబ్బందులకు గురి చేస్తున్నారని హైకోర్టులో పిటిషన్ దాఖలు చేశారు. దీనిపై విచారణ జరిపిన జడ్జి కౌంటర్‌ దాఖలు చేయాలని సీబీఐని ఆదేశించింది. మరోవైపు సునీల్ దాఖలు చేసిన పిటిషన్ గురువారం విచారణకు రావాల్సి ఉంది.. కానీ విచారణకు రాకపోవడంతో సునీల్ తరఫు న్యాయవాది టీఎల్‌ నయన్‌ కుమార్ జడ్జి ముందు ప్రస్తావించారు. దీంతో శుక్రవారం విచారణ జరుపుతానని జడ్జి తెలిపారు.
0 Comments