విశాఖ: బ్యాంకులో దూరిన దొంగలు.. లోపలికి వెళ్లాక దిమ్మ తిరిగింది, చివరికి!

జిల్లాలో దొంగలు రెచ్చిపోయారు. కంచరపాలెం ఊర్వశికూడలి వద్దనున్న స్టేబ్ బ్యాంక్ ఆఫ్ ఇండియాలోకి ఇద్దరు దొంగలు ప్రవేశించారు. గురువారం తెల్లవారుజామున బ్యాంక్ వెనుక వైపున ఉన్న కిటికీని తొలగించి లోపలికి వెళ్లారు. ఆ తర్వాత సీసీ కెమెరాలు, బ్యాంకు సర్వర్ వైర్లను తొలగించేందుకు ప్రయత్నం చేశారు. అది సాధ్యం కాకపోవడంతో బ్యాంకులోని క్యాష్ క్యాబిన్ అద్దం విరగ్గొట్టి గాలించారు. ఆ తర్వాత బ్యాంక్ లోపలి నుంచే పక్కనున్న ఏటీఎం కేంద్రంలోకి వెళ్లి పరిశీలించారు. అక్కడా కూడా ఏమీ దొరక్కపోవడంతో వచ్చిన దారినే తిరిగి వెళ్లిపోయారు. అయితే.. దొంగలు యూపీఎస్ సర్వర్ వైర్లు కత్తిరించేందుకు ప్రయత్నించిన కారణంగా సర్వర్ నెమ్మదించింది. దీంతో బ్యాంకు అధికారులకు సమాచారం వెళ్లింది. ఏదో జరిగిందని అనుమానించిన బ్యాంకు అధికారులు ఉదయాన్నే బ్యాంకు వద్దకు వచ్చి పరిశీలించారు. తలుపులు తెరిచి లోపలికి వెళ్లి చూడగా క్యాబిన్ అద్దం విరిగి ఉండటం, కిటికీ తొలగించి ఉండటం, యూపీఎస్ వైర్లు లాగినట్లు ఉండటం చూసి దొంగలు చోరీకి ప్రయత్నించినట్లు భావించారు. వెంటనే బ్రాంచి మేనేజర్‌కు సమాచారం ఇచ్చారు. కంచరపాలెం క్రైమ్ పోలీసులకు ఫిర్యాదు చేశారు. పోలీసులు బ్యాంకుకు వెళ్లి పరిశీలించారు.. అక్కడున్న సీసీ కెమెరాలో దొంగలు చోరీకి ప్రయత్నించిన దృశ్యాలు నమోదయ్యాయి. ఆ పుటేజీల ఆధారంగా క్రైం బ్రాంచ్ పోలీసులు దొంగలను గుర్తించే ప్రయత్నం చేస్తున్నారు. మరోవైపు.. విశాఖలో దొంగలు రెచ్చిపోతున్నారు. మొన్న గాజువాకలో కార్ల దొంగతనం చేశారు. నిన్న నేవీ అధికారుల కార్లు దొంగిలించారు. ఆ కేసుల్లో ఇంకా దర్యాప్తు జరుగుతుండగానే ఈ దొంగతనం జరిగింది.