ఏపీ: జడ్జిలపై సోషల్ మీడియాలో అసభ్యకర పోస్టులు.. మరో ఇద్దరికి సీబీఐ షాక్

కోర్టుల్లో జడ్జిలపై అనుచిత వ్యాఖ్యల కేసులో దూకుడు పెంచింది. తాజాగా మరో ఇద్దరు నిందితులను అరెస్టు చేసింది. ఈ కేసులో ప్రధాన నిందితుడైన ప్రకాశం జిల్లాకు చెందిన కొండారెడ్డి.. గుంటూరుకు చెందిన సుధీర్‌ అరెస్టు చేశారు. ఇద్దరిని గుంటూరులోని నాలుగో అడిషనల్‌ జూనియర్‌ సివిల్‌ జడ్జి కోర్టులో హాజరుపరిచారు. నిందితులకు 14రోజులు రిమాండ్‌ విధించారు.. ఇద్దరినీ జిల్లా జైలుకు తరలించారు. వీరిలో కొండారెడ్డి గతేడాది ఏప్రిల్‌ 17న పాఠశాలలో ఇంగ్లీష్‌ మీడియం ప్రవేశపెట్టడానికి వ్యతిరేకంగా ఇచ్చిన తీర్పును నిరసిస్తూ హైకోర్టు న్యాయమూర్తిపై అనుచిత వ్యాఖ్యలతో తన ఫేస్‌బుక్‌ పేజీలో పోస్టు పెట్టాడు. ఆ పోస్టును గుంటూరుకు చెందిన సుధీర్‌ షేర్‌ చేశారు. ఈ కేసులో కొద్ది రోజుల క్రితం కడప జిల్లాకు చెందిన లింగారెడ్డి రాజశేఖరరెడ్డి కూడా కోర్టు ఆదేశాలతో రిమాండ్‌లో ఉన్నారు. పలు కేసుల్లో తీర్పులకు సంబంధించి హైకోర్టు ప్రధాన న్యాయమూర్తితో పాటు పలువురు జడ్జిలపై వైసీపీ కార్యకర్తలు అభ్యంతరకర రీతిలో సోషల్ మీడియాలో పోస్టింగ్‌లు పెట్టారు. ప్రభుత్వానికి వ్యతిరేకంగా వచ్చిన తీర్పులపై విమర్శలు చేశారు. న్యాయమూర్తులను కంచపరిచేలా సోషల్ మీడియాలో పోస్టులు పెట్టినవారిపై హైకోర్టు గతంలోనే తీవ్ర ఆగ్రహం వ్యక్తం చేసింది. దీన్ని సీరియస్‌గా పరిగణించింది. సమగ్ర విచారణ జరపాలని ఏపీ సీఐడీని ఆదేశించింది. గతంలో రిజిస్ట్రార్ స్వయంగా వెళ్లి సీఐడీకి ఫిర్యాదు చేశారు. అయితే సీఐడీ అధికారులు స్పందన సరిగా లేదంటూ సీబీఐ విచారణకు ఏపీ హైకోర్టు ఆదేశాలు జారీ చేసింది. దీంతో సీబీఐ కేసులు నమోదు చేసింది.