చంద్రబాబు వల్ల రూ. 8 వేల కోట్లు నష్టం.. ఆ లాలూచీనే కారణం.. ఎంపీ షాకింగ్ విషయాలు!

తెలుగు దేశం పార్టీ అధినేత, రాష్ట్ర ప్రతిపక్ష నాయకుడు చంద్రబాబునాయుడుపై వైఎస్సార్ కాంగ్రెస్ పార్టీ ప్రధాన కార్యదర్శి, ఆ పార్టీ పార్లమెంటరీ నేత మరోసారి తీవ్ర స్థాయిలో విరుచుకుపడ్డారు. గత పాలనను ఉద్దేశించి విజయసాయి షాకింగ్ కామెంట్స్ చేశారు. వైసీపీ ఎంపీల ఒత్తిడితో కేంద్ర ప్రభుత్వం పోలవరం అంచనాలను 47,725 కోట్లకు పెంచిందని, అయితే చంద్రబాబు లాలూచీ పడిన కారణంగా 8 వేల కోట్లు కోల్పోయామని వ్యాఖ్యానించారు. అలాగే రాష్ట్ర హక్కుల సాధన కోసం ఢిల్లీలో పోరాడుతున్నట్లు పేర్కొన్నారు. ఈ మేరకు విజయసాయిరెడ్డి వరుస ట్వీట్లు చేశారు. ‘‘సీఎం జగన్ గారి ఆదేశాల మేరకు మా ఎంపీల ఒత్తిడితో పోలవరం అంచనాలను రూ. 47,725 కోట్లకు పెంచడానికి కేంద్రం ఆమోదించింది. పెరిగిన వ్యయాల ప్రకారం రూ. 55,625 కోట్లకు పెంచాలని అభ్యర్థించినా అడ్వయిజరీ కమిటీ సూచనలకే ఓకే చెప్పింది. అప్పట్లో చంద్రబాబు లాలూచీ పడిన కారణంగా రూ. 8 వేల కోట్లు కోల్పోయాం. రాష్ట్ర హక్కుల కోసం గౌరవ ముఖ్యమంత్రి శ్రీ వైఎస్ జగన్ గారి నాయకత్వంలో అలుపెరుగని కృషి చేస్తున్నాం. ఏపీకి ప్రత్యేక హోదా, పోలవరం నిధులు, రాష్ట్ర రహదారుల అభివృద్ధి, ఉపాధిహామీ నిధులు, విశాఖ స్టీల్ ప్లాంట్, రైల్వే జోన్ ఇలా అన్ని అంశాలపైనా ఆయా కేంద్ర మంత్రులను కలిసి ఒత్తిడి చేస్తున్నాం.’’ అని విజయసాయిరెడ్డి వ్యాఖ్యానించారు.