బుల్లితెర ప్రేక్షకుల్ని ఎంతగానో ఆకట్టుకుంటున్న ‘కార్తీకదీపం’ సీరియల్.. నేడు(2021 జూలై 30)న 1105 ఎపిసోడ్‌కి ఎంటర్ అయ్యింది. 1105వ ఎపిసోడ్ హైలైట్స్..‘మీరొకసారి రండీ మాట్లాడాలి..’ అని రోషిణి మోనితకి కాల్ చేసి చెప్పడంతో.. ‘అంజీగాడు వచ్చి ఉంటాడా? చెప్పేసి ఉంటాడా? అంతా ఆ దీపే చేస్తోందా’ అనుకునే సరికి ప్రిమయణి వచ్చి.. ‘అమ్మా కాఫీ తెమ్మంటారా’ అంటుంది. దాంతో దీప ‘నాకు తీసుకునిరా’ అంటుంది. మోనిత, ప్రియమణి ఇద్దరూ షాక్ అవుతారు. దీప ముందుకొచ్చేసరికి.. ‘నేను బెంబేలుగా కనిపిస్తే ఇంకా ఆడుకుంటుంది.. దొరక్కూడదు’ అనుకుంటుంది మనసులో మోనిత. ‘రా అక్కా..’ అంటూనే ‘వెళ్లి కాఫీ తే’ అంటూ ప్రియమణితో చెబుతుంది. ‘నా దగ్గర తగ్గకూడదని, మేకపోతు గాంభీరం చూపిస్తున్నావా..’ అంటూ మొట్టికాయ వెయ్యబోతుంది. వెంటనే ఒక్కసారిగా సోఫాలో తూలి పడుతుంది మోనిత. ‘నాకు నిన్ను చూస్తే జాలేస్తుంది’ అని దీప అనడంతో.. ‘ఎందుకో’ అని తిప్పుకుంటుంది మోనిత. ‘నీకేదో ఫోన్ వచ్చి ఉంటుందే’ అని దీప అనగానే.. ‘ఏం ఫోన్ గురించి మాట్లాడుతుంది? రిజిస్టర్ నుంచి వచ్చిన ఫోన్ గురించా? రోషిణి నుంచి వచ్చిన ఫోన్ గురించా?’ అనుకుంటుంది మోనిత. ‘నాకు ఎవ్వరూ ఫోన్ చెయ్యలేదు’ అని అబద్దం చెప్పేస్తుంది. ఇంతలో రోషిణి నుంచి మరోసారి ఫోన్ వస్తుంది. ‘ఏసీపీ గారు కాల్ చేస్తే అలా గుడ్లు అప్పగించి చూస్తావేంటీ డాక్టర్ పాపా’ అంటుంది. దాంతో మోనిత ఫోన్ లిఫ్ట్ చేస్తుంది. ‘మేడమ్..’ అని అనగానే.. ‘బయలుదేరావా?’ అంటుంది రోషిణి. ‘వస్తున్నా మేడమ్..’ అని మోనిత అంటే.. ‘నీకోసం కూడా వెయిట్ చెయ్యాలా? త్వరగా రా..’ అని ఫైర్ అవుతుంది. ‘ఇప్పుడు నేను రోషిణి మేడమ్ దగ్గరకు వెళ్తున్నాను.. అప్పుడు చెబుతాను.. ’ అంటూ దీప ముందు చిటికెలు వేస్తూ.. ‘నిన్ను నీ కార్తీక్‌ని నీ ఫ్యామిలీ మొత్తాన్నీ.. బయటికి లాగుతాను’ అంటూ సవాల్ విసిరి అక్కడ నుంచి బయలుదేరుతుంది మోనిత. మోనిత కొంత దూరం ఆవేశంగా వెళ్లగానే.. దీప చిటికెలు వేసి పొగరుగా చూస్తూ మోనితని ఆపుతుంది. ‘వెళ్తున్నాను కాదు.. వెళ్తున్నాం.. మనమిద్దరం వెళ్తున్నాం.. మేడమ్ నాకు కూడా కాల్ చేసి ఒకసారి రా దీపా అన్నారు.. రావమ్మా చిలకమ్మా.. నీ చిలకపలుకు అక్కడ వినిపిద్దువుగానీ రా.. పదా.. అక్కడ అంజీ ఉన్నాడో దుర్గ ఉన్నాడో.. నీ పాత నేరాలు కొత్త కథనాలు ఏం చెబుతున్నారో మరి..దదా’ అంటూ మోనిత వెన్నులో వణుకు పుట్టిస్తుంది మన వంటలక్క. మోనిత భుజంపై చెయ్యి వేసుకుని మరీ లాక్కుని వెళ్తుంది. పిల్లలు పూల మొక్కలు నాటుతూ.. ఉండగా కార్తీక్ వస్తాడు. ‘డాడీ.. నీకు తెలుసా ఇవి పువ్వులు పోసే సరికి అమ్మ ఓ గుడ్ న్యూస్ చెబుతానంది’ అనడంతో మనసులో ఆలోచనలో పడతాడు కార్తీక్. ‘నా పిల్లలకి నిజం తెలియకముందే అంజీని పట్టుకుని నిజం చెప్పించాలి’ అని కార్తీక్ మనసులో అనుకుంటాడు. జరిగింది అంతా తలుచుకున్న ఆనందరావు.. దీప మాటలను మళ్లీ గుర్తు చేసుకుని.. ‘నేను నా పెద్ద కొడుకుతో మాట్లాడాలి రా.. అన్నయ్యని రమ్మను.. తిట్టను లేరా’ అంటాడు ఆదిత్యతో. దీప, మోనిత కలిసి రోషిణి దగ్గరకు రావడంతో.. ‘ఈ కాంబినేషన్ ఏంటీ.. దీప నిన్ను నేను పిలవలేదుగా’అంటుంది. మోనిత షాక్ అవుతుంది. దీప అబద్దం చెప్పిందని అర్థమైంది. ‘నిన్ను అర్జెంట్‌గా పిలవడానికి కారణం అంజి’ అనడంతో మోనిత బిత్తరపోతుంది. అటు దీప, ఇటు మోనిత కూర్చుంటే.. రోషిణి మాత్రం మోనితని విచారించే తీరు ఉత్కంఠగా మారింది. సరిగ్గా అదే సమయానికి ఆనందరావు దగ్గరకు కార్తీక్ పిల్లల్ని తీసుకుని వెళ్తాడు. పిల్లలు పలకరించి వెళ్లాక కార్తీక్ వచ్చి ఆనందరావు పక్కనే కూర్చుంటాడు. ‘నిన్నుచాలా మాటలు అన్నాను.. నీకంటే ఎక్కువగా నాకే బాధగా ఉంది.. నేను పిలిచింది నాకోసం మాట్లాడాలని కాదు.. నాకోడలు దీప గురించి చెప్పాలని.. దీప నిజంగా దీపమేరా.. నువ్వు చీకట్లో నిలబడినప్పుడు వెలుగులా నీ ఎదురుగా ఉంటుంది.. అవకాశం దొరికానా నిన్ను అవమానించడంలేదు.. నిన్ను నేను దూరంగా ఉంచానని నీకంటే చాలా ఎక్కువగా బాధపడింది. నీ భార్య నీ తప్పు లేదని అంటోంది. అది నిరూపించుకోరా.. ఆ మోనితని నీ జీవితంలోకి రానివ్వకు.. జాగ్రత్తపడరా.. ఈ పెళ్లికి నువ్వు తల వంచితే దీపకు పూర్తిగా అన్యాయం చేసినవాడివి అవుతావ్..’ అంటాడు ఆనందరావు ప్రేమగా. ‘లేదు డాడీ.. దీపను పిల్లల్ని ప్రాణంగా చూసుకుంటాను.. నువ్వు నమ్మితే చాలు.. అపరాదిలా చూడకపోతే చాలు’ అంటాడు కార్తీక్. దాంతో ఆనందరావు ‘సరే’ అన్నట్లుగా తలాడిస్తాడు. సీన్ రోషిణి ఇంటి దగ్గర ఓపెన్ చేస్తే.. మోనిత టెన్షన్ కనిపించకుండా కవర్ చేసుకుంటుంది. రోషిణి విచారణ మొదలుపెడుతుంది. ‘అంజి ఒక కత్తిలాంటి డ్రైవర్.. గతంలో డబ్బు కోసం ఏదైనా చేసేవాడు. డబ్బు లిస్తే ఎవరినైనా లేపెస్తాడు. అలాంటి అంజీ నీకు ఎలా తెలుసు?’ అంటుంది రోషిణి. ‘నా..కు.. అంజీతో పెద్దగా పరిచయం లేదు మేడమ్’ అంటుంది మోనిత కాస్త కంగారు పడుతూ. ‘చిన్నగా పరిచయం ఉందా’అంటుంది రోషిణి. ‘కార్తీక్ ఇంట్లో డ్రైవర్‌గా పని చేసేవాడు’ అంటుంది మోనిత. ‘అదే ఆ డ్రైవరే నీకెలా తెలుసు అని అడుగుతున్నాను’ అంటుంది రోషిణి. ‘నాకు అంతకు ముందు తెలియదు’ అంటుంది మోనిత. ‘నిజంగా తెలియదా?’ అని రోషిణి మరోసారి అడగడంతో.. ‘ఏ పరిచయం లేకుండానే ఏ కారణం లేకుండానే రిజిస్టర్ ఆఫీస్‌కి ఫోన్ చేసి పెళ్లి ఆపించేస్తాడా? అంజీ నిన్ను ప్రేమించాడా’ అంటుంది రోషిణి అనుమానంగా. ‘ఛీ..ఛీ..’ అంటుంది మోనిత. ‘పోనీ పెళ్లి చేసుకుందామనుకున్నారా?’ అంటుంది రోషిణి. ‘ఛీ.. డ్రైవర్‌తో నాకు ప్రేమ పెళ్లి ఏంటి మేడమ్’ అంటే.. ‘పోనీ.. పగ ఉందా’ అంటుంది రోషిణి. మోనిత బిత్తరపోతుంది. మరిన్ని వివరాలు తరువాయి భాగంలో చూద్దాం! ‘కార్తీకదీపం’ కొనసాగుతోంది.
0 Comments