విజయసాయికి ఎంపీ రఘురామ షాక్.. బెయిల్ రద్దుపై, 2 రోజుల్లోనే.. సంచలనం!

వైఎస్సార్ కాంగ్రెస్ పార్టీ ప్రధాన కార్యదర్శి, ఆ పార్టీ పార్లమెంటరీ నేత విజయసాయిరెడ్డికి షాకిచ్చేందుకు నరసాపురం వైసీపీ రెబల్ ఎంపీ సిద్ధమయ్యారు. ఇప్పటికే సొంత పార్టీ వైసీపీకి తలనొప్పిగా మారిన రఘురామ.. ఇప్పుడు ముఖ్యమంత్రి వైఎస్ జగన్మోహన్ రెడ్డి, ఎంపీ విజయసాయిరెడ్డిని నేరుగా టార్గెట్ చేస్తున్నారు. ఇప్పటి వరకు ముఖ్యమంత్రి జగన్మోహన్ రెడ్డి బెయిల్ రద్దు చేయించేందుకు గట్టిగా ప్రయత్నిస్తున్న ఎంపీ రఘురామ.. తాజాగా, విజయసాయిని టార్గెట్ చేశారు. ప్రెస్మీట్లలో నేరుగా పేర్లతో సంబోధించకుండా.. సీఎం జగన్‌ను ఏ1గా, విజయసాయిని ఏ2గా సంభోదిస్తున్న ఎంపీ రఘురామ.. ప్రభుత్వంపై జగన్ సర్కారుపై తిరుగుబాటు చేస్తున్నారు. ఈ క్రమంలోనే విజయసాయిరెడ్డిపై షాకింగ్ కామెంట్స్ చేశారు. విదేశాలకు పారిపోవాలని చూస్తున్నారని, 2 రోజుల్లో ఆయన బెయిల్‌ను కూడా రద్దు చేయాలని పిటిషన్ వేస్తానని ప్రకటించి, సంచలనం రేపారు. ఇప్పటికే తన ఆస్తులకు సంబంధించిన కేసుల్లో 11 చార్జిషీట్లలో ఏ1 నిందితుడిగా ఉన్న సీఎం జగన్ బెయిల్‌ను రద్దు చేయాలని ఇప్పటికే కోర్టులో రఘురామ పిటిషన్ దాఖలు చేసిన విషయం తెలిసిందే. వైఎస్ జగన్ సీఎం పదవిని అడ్డుపెట్టుకుని కేసులను నీరుగారుస్తూ, సీబీఐ అధికారులు, సాక్ష్యాలను ప్రలోభాలకు గురిచేస్తూ నిబంధనలకు విరుద్ధంగా వ్యహరిస్తున్నారని, కాబట్టి బెయిల్ రద్దు చేయాలని హైదరాబాద్ నాంపల్లిలోని సీబీఐ కోర్టులో పిటిషన్ దాఖలు చేశారు. రఘురామ పిటిషన్‌పై విచారణ జరిపిన సీబీఐ కోర్టు.. కేసును ఆగస్టు 25కు వాయిదా వేసింది. అదే రోజు తీర్పు వెలువరించే అవకాశం ఉంది. ఈ నేపథ్యంలో విజయసాయిరెడ్డి బెయిల్ రద్దు చేయాలని కూడా కోర్టులో పిటిషన్ దాఖలు చేస్తానంటూ ఎంపీ రఘురామ మరో సంచలనానికి తెరలేపారు.