దళిత మహిళ లాకప్ డెత్ ఘటనలో మరో పోలీసు అధికారిపై వేటు పడింది. చింతకాని ఎస్సై రెడ్డబోయిన ఉమను ఖమ్మం పోలీస్ కమిషనరేట్‌కు ఎటాచ్‌ చేస్తూ ఉత్తర్వులు జారీ అయ్యాయి. రెండు రోజుల క్రితం ఖమ్మంలో పర్యటించి మరియమ్మ కుమారుడు ఉదయ్ కిరణ్‌ను పరామర్శించిన డీజీపీ మహేందర్ రెడ్డి.. చింతకాని పీఏస్‌లో ఏం జరిగిందన్న దానిపై వివరాలు అడిగి తెలుసుకున్నారు. డీజీపీ పర్యటన అనంతరం చింతకాని ఎస్సైపై చర్యలు తీసుకున్నారు. ఈ ఘటనలో మరి కొంతమంది పోలీస్ అధికారులపై వేటు పడే అవకాశం ఉన్నట్లు సమాచారం. ఇప్పటికే అడ్డగూడురు పోలీస్‌స్టేషన్‌కు చెందిన పోలీస్ అధికారులపై చర్యలు తీసుకున్న విషయం తెలిసిందే. మరియమ్మ లాకప్ డెత్ ఘటనపై తెలంగాణ ప్రభుత్వం సీరియస్‌గా ఉంది. దీనిపై సత్వర విచారణ జరపాలని ఇప్పటికే సీఎం కేసీఆర్ డీజీపీని ఆదేశించిన సంగతి తెలిసిందే. అంబడిపూడి మరియమ్మ అనే దళిత మహిళ పోలీసుల కస్టడీలో ఉండగానే మరణించడం తెలంగాణలో సంచలనంగా మారిన సంగతి తెలిసిందే. ఖమ్మం జిల్లా చింతకాని సమీపంలోని కోమట్లగూడేనికి చెందిన మరియమ్మ కుమారుడు ఉదయ్, ఆయన స్నేహితుడు శంకర్ ఓ ఇంట్లో దొంగతనం చేసినట్లు ఫిర్యాదు రావడంతో యాదాద్రి జిల్లా అడ్డగూడూరు పోలీసులు వారిని అరెస్ట్ చేసి విచారించారు. వారిద్దరి వాంగ్మూలం ప్రకారం మరియమ్మను కూడా పోలీసులు తరువాత అదుపులోకి తీసుకున్నారు. జూన్ 18న ఉదయం 7.45 గంటలకు మరియమ్మను, ఆమె కుమారుడు ఉదయ్, ఆయన స్నేహితుడు శంకర్‌లను స్టేషన్‌కు తీసుకువచ్చారు. విచారణ పూర్తి చేశారు. విచారణలో వెంటనే వారు నేరాన్ని అంగీకరించారు. వారి నుంచి దొంగతనం అయిన సొమ్ము రికవరీ చేశారు. అయితే, మరుసటిరోజు పోలీసు స్టేషన్‌లో మరియమ్మ స్పృహ తప్పింది. వెంటనే ఆమెను భువనగిరి ఆసుపత్రికి తరలిస్తుండగా మృతి చెందిందని పోలీసులు ఎఫ్ఐఆర్ నమోదు చేశారు.
0 Comments