అకస్మాత్తుగా ఈటల ఢిల్లీ పర్యటన.. కేంద్ర నేతలతో కీలక భేటీ

మాజీ మంత్రి ఈటల రాజేందర్ త్వరలో బీజేపీలో చేరుతారన్న వార్తలు వినిపిస్తున్న విషయం తెలిసిందే. ఈక్రమంలో ఆయన ఆదివారం ఢిల్లీకి పయనమయ్యారు. దీంతో ఈటల హస్తిన పర్యటన ఆసక్తికరంగా మారింది. మాజీ ఎమ్మెల్యే ఏనుగు రవీందర్‌రెడ్డితో పాటు కలిసి ఆయన ఢిల్లీకి వెళ్లారని సమాచారం. ఇక బీజేపీ రాష్ట్ర ముఖ్య నేతలు కూడా సోమవారం హస్తిన ప్రయాణం పెట్టుకోవడం ఆసక్తి కలిగిస్తోంది. రాష్ట్ర బీజేపీ ముఖ్య నేతలతో కలిసి ఈటల సోమవారం ఆ పార్టీ జాతీయ అధ్యక్షుడు జేపీ నడ్డాతో భేటీ అవుతారని, వీలుంటే అమిత్‌ షాను కూడా కలుస్తారని తెలుస్తోంది. సోమవారం ఉదయం బీజేపీ రాష్ట్ర అధ్యక్షుడు బండి సంజయ్, హోంశాఖ సహాయ మంత్రి జి.కిషన్‌రెడ్డి కూడా ఢిల్లీకి వెళ్లనున్నట్లు తెలిసింది. అయితే కిషన్‌రెడ్డికి ఇక్కడ కోవిడ్‌ బాధితులకు బియ్యం, నిత్యావసరాల పంపిణీని పరిశీలించే కార్యక్రమం ఉందని, ఈ కార్యక్రమం ముగించుకుని ఆయన ఢిల్లీ వెళ్లే అవకాశం ఉందని బీజేపీ వర్గాల సమాచారం. మాజీ ఎంపీ వివేక్‌ ఇప్పటికే ఢిల్లీ వెళ్లారు ఈ క్రమంలో సోమవారం ఉదయం 11 గంటలకు నడ్డాతో ఈటల భేటీ అవుతారు. అయితే సోమవారం బీజేపీలో చేరిక కార్యక్రమం ఉండకపోవచ్చని, కొన్ని విషయాలపై స్పష్టమైన హామీలు తీసుకుని హైదరాబాద్‌ తిరిగి వస్తారని సమాచారం. బీజేపీ పెద్దల నుంచి స్పష్టమైన హామీలు లభిస్తే, ఆ తర్వాత నిర్ణయాన్ని ప్రకటించి బీజేపీలో అట్టహాసంగా చేరేందుకు వీలుగా షెడ్యూల్‌ను ఖరారు చేసుకుంటారని తెలుస్తోంది. తనకు రాజకీయ రక్షణ కల్పించడంతో పాటు, తనకు ఇవ్వాల్సిన ప్రాధాన్యతపైనా చర్చిస్తారు. బీజేపీ అధిష్టానం నుంచి ఈ మేరకు స్పష్టమైన హామీలు పొందాకే తాను ఎప్పుడు రాజీనామా చేయాలి? ఎప్పుడు బీజేపీలో చేరాలన్న అంశాలపై నియోజకవర్గ నేతలతో చర్చించి తుది నిర్ణయం తీసుకుంటారని ఈటల అనుచరవర్గాలు వెల్లడించాయి.