ఐపీఎల్ 2021 సీజన్‌‌లో తడబడుతున్న ముంబయి ఇండియన్స్, రాజస్థాన్ రాయల్స్ జట్లు గురువారం ఢిల్లీలోని అరుణ్ జైట్లీ స్టేడియంలో మధ్యాహ్నం 3.30 గంటలకి తలపడబోతున్నాయి. ఇప్పటి వరకూ ఐదు మ్యాచ్‌లాడిన ముంబయి టీమ్ రెండింటిలో మాత్రమే గెలుపొందగా.. రాజస్థాన్ రాయల్స్ కూడా రెండు మ్యాచ్‌ల్లో విజయం సాధించింది. అయితే.. ముంబయి టీమ్ తన చివరి మ్యాచ్‌లో పంజాబ్ కింగ్స్ చేతిలో 9 వికెట్ల తేడాతో ఓడిపోగా.. రాజస్థాన్ మాత్రం కోల్‌కతా నైట్‌రైడర్స్‌పై తన చివరి మ్యాచ్‌లో 6 వికెట్ల తేడాతో గెలిచి మళ్లీ లయ అందుకుంది. ఐపీఎల్‌లో ముంబయి, రాజస్థాన్ హెడ్ టు హెడ్ రికార్డుల్ని ఓసారి పరిశీలిస్తే..? ఇప్పటి వరకూ ఈ రెండు జట్లు 23 మ్యాచ్‌ల్లో తలపడగా.. ఇందులో చెరో 11 మ్యాచ్‌ల్లో విజయం సాధించాయి. ఇక మిగిలిన ఒక మ్యాచ్‌లో మాత్రం ఫలితం తేలలేదు. అలానే ఈ రెండు జట్లు తలపడిన సందర్భాల్లో భారీ స్కోర్లు నమోదవుతున్నట్లు రికార్డులు చెప్తున్నాయి. రాజస్థాన్‌పై ముంబయి ఇండియన్స్ ఇప్పటి వరకూ చేసిన అత్యధిక స్కోరు 212 పరుగులుకాగా.. ముంబయిపై రాజస్థాన్ చేసిన అత్యధిక స్కోరు 208 పరుగులు. ముంబయి జట్టులో కెప్టెన్ రోహిత్ శర్మ నిలకడగా రాణిస్తున్నా.. ఇప్పటి వరకూ ఓపెనర్ డికాక్ చెప్పుకోదగ్గ ప్రదర్శన ఒక్కటీ చేయలేదు. దాంతో.. మిడిలార్డర్‌పై ఒత్తిడి పడుతోంది. ఇషాన్ కిషన్, సూర్యకుమార్ యాదవ్ దూకుడుగా ఆడుతున్న.. వారిలో నిలకడ లోపిస్తోంది. ఇక హార్దిక్ పాండ్య క్రీజులోకి వచ్చినప్పటి నుంచి టాప్‌గేర్‌లో ఆడాలని చూస్తూ.. ప్రత్యర్థికి అప్పనంగా వికెట్ సమర్పించుకుంటున్నాడు. అయితే.. కీరన్ పొలార్డ్ ఒక్కడే సీజన్ ఆరంభం నుంచి కాస్త నిలకడగా ఆడుతూ.. ఫినిషర్ రోల్‌ని చక్కగా పోషిస్తున్నాడు. కానీ.. అతనికి స్లాగ్ ఓవర్లలో ఎవరూ సపోర్ట్ ఇవ్వలేకపోతుండటంతో.. ముంబయి ఇప్పటి వరకూ మెరుగైన స్కోరు చేయలేకపోయింది. బౌలింగ్‌లో జస్‌ప్రీత్ బుమ్రా, ట్రెంట్ బౌల్ట్ ఆ టీమ్‌కి ప్రధాన బలం.. పవర్ ప్లేతో పాటు డెత్ ఓవర్లలోనూ ఈ జోడీ గెలిపించే ప్రదర్శన కనబరుస్తోంది. ఇక మిడిల్ ఓవర్లలో స్పిన్నర్ రాహుల్ చాహర్ వికెట్లు పడగొట్టే బాధ్యత తీసుకుంటున్నాడు. కానీ.. అతనికి జోడీగా బౌలింగ్ చేస్తున్న కృనాల్ పాండ్య ధారాళంగా పరుగులిచ్చేస్తూ ప్రత్యర్థికి పుంజుకునే అవకాశం కల్పిస్తున్నాడు. మరో స్పిన్నర్ జయంత్ యాదవ్ పొదుపుగా బౌలింగ్ చేస్తున్నా.. వికెట్లు పడగొట్టలేకపోతున్నాడు. మొత్తంగా.. చివరి రెండు మ్యాచ్‌ల్లోనూ ఓడిన ముంబయి ఇప్పుడు ఒత్తిడిలో ఉంది. రాజస్థాన్ జట్టులో ఓపెనర్ జోస్ బట్లర్ కీలక సమయాల్లో వికెట్లు చేజార్చుకుంటూ ఆ జట్టుని ఒత్తిడిలోకి నెడుతున్నాడు. పవర్ ప్లే‌లో దూకుడుగా ఆడాలని ప్రయత్నిస్తున్న బట్లర్.. మ్యాచ్ గమనానికి అనుగుణంగా ఆడటం లేదు. ఇక యువ ఓపెనర్ యశస్వి జైశ్వాల్ ఆడిన ఫస్ట్ మ్యాచ్‌లో వరుస బౌండరీలతో హోరెత్తించాడు. అయితే.. అతని నుంచి కనీసం ఓ హాఫ్ సెంచరీని రాజస్థాన్ ఆశిస్తోంది. కెప్టెన్ సంజు శాంసన్ ఫామ్ అందుకోగా.. శివమ్ దూబె, రాహుల్ తెవాటియా, డేవిడ్ మిల్లర్, రియాన్ పరాగ్ మంచి టచ్‌‌లో ఉండటం రాజస్థాన్‌కి కలిసొచ్చే అంశం. బౌలింగ్ పరంగా రాజస్థాన్ ఎవరూ ఊహించనిరీతిలో మెరుగైంది. క్రిస్ మోరీస్ ఆ టీమ్ బౌలింగ్ విభాగాన్ని ముందుండి నడిపిస్తున్నాడు. ఎడమచేతి వాటం పేసర్లు చేతన్ సకారియా, ముస్తాఫిజుర్, జయదేవ్ ఉనద్కత్.. ప్రత్యర్థి భాగస్వామ్యాల్ని విడదీయడంలో పోటీపడుతున్నారు. కానీ.. ప్రొఫెషనల్ స్పిన్నర్ లేని లోటు ఆ జట్టులో స్పష్టంగా కనిపిస్తోంది. రాహుల్ తెవాటియా, రియాన్ పరాగ్‌లు కలిసి ఓ నాలుగు ఓవర్లు వేస్తున్నా.. పెద్దగా ప్రయోజనం కనబడటం లేదు. మొత్తంగా ఐదు సార్లు ఛాంపియన్ అయిన ముంబయి ఇండియన్స్‌ని ఓడించాలంటే రాజస్థాన్ అత్యుత్తమ ప్రదర్శన కనబర్చాల్సిందే.
0 Comments