ఐపీఎల్ 2021 సీజన్ పాయింట్ల పట్టికలో చెన్నై సూపర్ కింగ్స్ మళ్లీ టాప్‌లోకి దూసుకెళ్లింది. సన్‌రైజర్స్ హైదరాబాద్‌తో ఢిల్లీలోని అరుణ్ జైట్లీ స్టేడియం వేదికగా బుధవారం రాత్రి జరిగిన మ్యాచ్‌లో 7 వికెట్ల తేడాతో విజయాన్ని అందుకున్న చెన్నై సూపర్ కింగ్స్.. ఐదు విజయాలతో నెం.2 నుంచి అగ్రస్థానానికి ఎగబాకింది. రాయల్ ఛాలెంజర్స్ బెంగళూరు టీమ్‌ కూడా ఐదు విజయాలు సాధించి ఉన్నా.. ఆ జట్టుతో పోలిస్తే చెన్నై సూపర్ కింగ్స్ మెరుగైన రన్‌రేట్ ఉండటంతో నెం.1 స్థానం దక్కింది. దాంతో.. బెంగళూరుకి రెండుకి పడిపోయింది. పాయింట్ల పట్టికలో చెన్నై సూపర్ కింగ్స్ (10 పాయింట్లు), రాయల్ ఛాలెంజర్స్ బెంగళూరు (10) ఆరు మ్యాచ్‌లకిగానూ ఐదింట్లో గెలుపొంది టాప్-2లో ఉండగా.. ఆ తర్వాత ఢిల్లీ క్యాపిటల్స్ (8), ముంబయి ఇండియన్స్ (4) టాప్-4లో కొనసాగుతున్నాయి. సీజన్ లీగ్ దశ ముగిసే సమయానికి టాప్-4లో నిలిచిన జట్లు ప్లేఆఫ్‌కి అర్హత సాధించనున్నాయి. ఇక కోల్‌కతా నైట్‌రైడర్స్ (4), పంజాబ్ కింగ్స్ (4) ఐదు, ఆరు స్థానాల్లో ఉండగా.. రాజస్థాన్ రాయల్స్ (4), సన్‌రైజర్స్ హైదరాబాద్ (2) చివరి రెండు స్థానాల్లో కొనసాగుతున్నాయి. తాజా సీజన్‌లో ఇప్పటికే ఆరు మ్యాచ్‌లాడిన హైదరాబాద్ గెలిచిన మ్యాచ్‌లు ఒక్కటే. ఈరోజు మధ్యాహ్నం 3.30 గంటలకి ముంబయి ఇండియన్స్, రాజస్థాన్ రాయల్స్ జట్లు ఢిల్లీలోని అరుణ్ జైట్లీ స్టేడియంలో ఢీకొనబోతుండగా.. రాత్రి 7.30 గంటలకి ఢిల్లీ క్యాపిటల్స్‌తో కోల్‌కతా నైట్‌రైడర్స్ అహ్మదాబాద్‌లోని నరేంద్ర మోడీ స్టేడియంలో తలపడనుంది.
0 Comments