సీనియర్ ఐపీఎస్ అధికారిణి రష్మీ శుక్లాకు పోలీసులు నోటీసులు జారీ చేశారు. ఫోన్ ట్యాపింగ్ కేసుకు సంబంధించి విచారణకు హాజరు కావాలని కోరారు. అయితే ఆ నోటీసులపై స్పందించిన ఆమె కోవిడ్ కారణంగా తాను ఈ పరిస్థితుల్లో విచారణకు హాజరయ్యేది లేదని తేల్చి చెప్పారు. తనను ఏం ప్రశ్నలు అడగాలనుకుంటున్నారో వాటిని.. ఎఫ్ఐఆర్ కాపీతో పాటు జత చేసి పంపాలన్నారు. వివరాల్లోకి వెళ్తే.. హైదరాబాద్‌లోని చంద్రాయణగుట్టలో ఉన్న సెంట్రల్‌ రిజర్వ్‌ పోలీసు ఫోర్స్‌ (సీఆర్పీఎఫ్‌) సౌత్‌జోన్‌ కార్యాలయంలో స్పెషల్‌ డైరెక్టర్‌ జనరల్‌గా సీనియర్ ఐపీఎస్ అధికారిణి రష్మి శుక్లా పనిచేస్తున్నారు. ఈమెకు ముంబై సైబర్ క్రైమ్ పోలీసులు నోటీసులు జారీ చేశారు. గతంలో శుక్లా మహారాష్ట్ర ఇంటెలిజెన్స్‌ విభాగం కమిషనర్‌గా విధులు నిర్వర్తించారు. అప్పట్లో ముంబైకి చెందిన రాజకీయ నాయకులు సహా అనేక మంది ప్రముఖుల ఫోన్లు ట్యాప్‌ చేసిన వ్యవహారానికి సంబంధించి సైబర్ క్రైమ్ పోలీసులు ఆమెపై కేసు నమోదు చేశారు. దీని దర్యాప్తులో భాగంగా రష్మి నుంచి వాంగ్మూలం నమోదు చేయాలని అధికారులు నిర్ణయించారు. ఇందులో భాగంగానే బుధవారం ముంబై రావాలంటూ సోమవారం నోటీసులు జారీ చేశారు. వాంగ్మూలం నమోదు కోసం బుధవారం ముంబైలో ఉన్న ఆమె ఇంటికి రావాలని కోరారు. ఉదయం 11 గంటలకు తాము వచ్చి వాంగ్మూలం నమోదు చేస్తామని నోటీసులు జారీ చేశారు. అయితే కోవిడ్ సెకండ్‌ వేవ్‌ నేపథ్యంలో తాను అక్కడకు రావడం సాధ్యం కాదంటూ రష్మి శుక్లా జవాబు ఇచ్చారు. తనపై నమోదైన ఎఫ్ఐఆర్ కాపీతో పాటు తనను ఏం ప్రశ్నలు అడగాలనుకుంటున్నారో ఆ ప్రశ్నావళిని పంపాల్సిందిగా శుక్లా సమాధానమిచ్చినట్లు సమాచారం గత ఏడాది మహారాష్ట్రకు చెందిన ఐపీఎస్‌లతో వివిధ హోదాలకు చెందిన పోలీసుల బదిలీలు జరిగాయి.కొందరి పోస్టింగ్స్‌ కోసం భారీ మొత్తం చేతులు మారిందనే ఆరోపణలు కూడా ఉన్నాయి.
0 Comments