ధైర్యమే ఆమె ఆయుధం... కరోనాను జయించిన 97 ఏళ్ల వృద్ధురాలు

ఓ వైపు చాలామంది కరోనా బారిన పడి చిన్న వయసులోనే ప్రాణాలు కోల్పోతుంటే.. మరోవైపు కొందరు వృద్ధులు మాత్రం మలి వయసులోనూ మహమ్మారిని ధైర్యంగా ఎదుర్కొని అందరికీ ఆదర్శంగా నిలుస్తున్నారు. ఈ కోవలోనే నిర్మల్‌ జిల్లా కేంద్రంలోని ప్రియదర్శినినగర్‌కు చెందిన 97 ఏళ్ల గంప భాగీరథ అనే వృద్ధురాలు కొవిడ్‌ను జయించారు. ఇటీవల ఆమెకు కొద్దిపాటి లక్షణాలు కన్పించగానే కుటుంబ సభ్యులు కరోనా పరీక్ష చేయించగా పాజిటివ్ వచ్చింది. దీంతో ఆమెను హోం క్వారటైన్‌లో 14 రోజులు ఉంచారు. కరోనా సోకిందని చెప్పినప్పటికీ బామ్మ అధైర్యపడకుండా క్రమం తప్పకుండా మందులు వాడారని, తన పనులు తానే స్వయంగా చేసుకుని వైరస్‌ నుంచి బయటపడ్డారని కుటుంబ సభ్యులు తెలిపారు. గురువారం ఆమెకు కరోనా పరీక్ష చేయించగా నెగెటివ్‌ వచ్చిందని, ప్రస్తుతం సంపూర్ణ ఆరోగ్యంతో ఉన్నారని ఆమె కుమారుడు గంప శ్రీనివాస్‌ పేర్కొన్నారు. మహమ్మారిని ధైర్యంగా జయించిన ఈ బామ్మ కరోనా బాధితులకు స్ఫూర్తిదాయకమని స్థానికులు కొనియాడుతున్నారు.