తెలంగాణలో పురపాలక ఎన్నికలకు రంగం సిద్ధమైంది. వరంగల్‌ మహా నగరపాలక సంస్థ, ఖమ్మం నగరపాలక సంస్థ, సిద్దిపేట, అచ్చంపేట, నకిరేకల్‌, జడ్చర్ల, కొత్తూరు పురపాలక సంఘాలకు శుక్రవారం ఎన్నికలు జరగనున్నాయి. ఈ ఎన్నికల్లో మొత్తం 11,34,032 మంది ఓటర్లు తమ ఓటు హక్కు వినియోగించుకోనున్నారు. ఎన్నికల ఏర్పాట్లపై రాష్ట్ర ఎన్నికల సంఘం గురువారం జిల్లా కలెక్టర్లు, పోలీసు కమిషనర్లు, ఎస్పీలు, జిల్లా వైద్య ఆరోగ్యశాఖ అధికారులు, పురపాలక కమిషనర్లతో వీడియో కాన్ఫరెన్స్‌ నిర్వహించింది. ఈ ఎన్నికల్లో హైకోర్టు ఉత్తర్వులకు అనుగుణంగా కొవిడ్‌ నిబంధనలను పకడ్బందీగా అమలు చేయాలని రాష్ట్ర ఎన్నికల కమిషనర్‌(ఎస్‌ఈసీ) సి.పార్థసారథి అధికారులను ఆదేశించారు. ఎన్నికల విధుల్లో ఉన్నవారు, ఓటర్లు కచ్చితంగా మాస్క్‌ ధరించాలని, చేతులు శానిటైజ్‌ చేసుకోవాలని సూచించారు. పోలింగ్‌ కేంద్రం వెలుపల, లోపల భౌతిక దూరం పాటించేలా చర్యలు తీసుకోవాలన్నారు. కొవిడ్‌ నిబంధనల అమలుకు ప్రతి పురపాలక సంఘానికి ఒకరిద్దరు నోడల్‌ అధికారులను నియమించాలని. రిసెప్షన్‌, కౌంటింగ్‌ సెంటర్లలో ఆక్సిజన్‌ సిలిండర్లతో కూడిన అంబులెన్స్‌లను సిద్ధంగా ఉంచాలని పార్థసారథి ఆదేశించారు. కౌంటింగ్‌ కేంద్రాల్లో పకడ్బందీ ఏర్పాట్లు ఉండాలని.. ఎన్నికల ధ్రువపత్రం అందుకోవడానికి అభ్యర్థితో పాటు మరొకరిని మాత్రమే అనుమతించాలన్నారు.
0 Comments