ఐపీఎల్‌లో ముంబయి ఇండియన్స్ టీమ్‌తో తాజాగా కెప్టెన్ చేరాడు. పుణె వేదికగా ఇంగ్లాండ్‌తో ఆదివారం రాత్రి ముగిసిన మూడో వన్డేలో ఆడిన రోహిత్ శర్మ.. రోజు వ్యవధిలోనే ముంబయికి చేరుకుని అక్కడ ముంబయి ఇండియన్స్ టీమ్‌తో చేరాడు. బీఎండబ్ల్యూ కారులో దర్జాగా ముంబయి ఇండియన్స్ టీమ్ బస చేసిన హోటల్‌కి రోహిత్ శర్మ వస్తున్న వీడియోని ముంబయి టీమ్ సోషల్ మీడియాలో షేర్ చేసింది. ఏప్రిల్ 9 నుంచి మే 30 వరకూ ఐపీఎల్ 2021 సీజన్ మ్యాచ్‌లు జరగనుండగా.. ముంబయి, కోల్‌కతా, ఢిల్లీ, చెన్నై, బెంగళూరు, అహ్మదాబాద్ సిటీలు మ్యాచ్‌లకి ఆతిథ్యం ఇవ్వబోతున్నాయి. టోర్నీ ఫస్ట్ మ్యాచ్‌లోనే చెన్నైలోని చెపాక్ స్టేడియంలో రాయల్ ఛాలెంజర్స్ బెంగళూరుతో ఏప్రిల్ 9న ముంబయి ఇండియన్స్ ఢీకొట్టబోతోంది. అయితే.. ఒక్క మ్యాచ్ కూడా తన సొంత మైదానం వాంఖడేలో ముంబయి ఇండియన్స్ ఆడే అవకాశం లేదు. టోర్నీలో అన్ని మ్యాచ్‌ల్నీ.. అన్ని జట్లూ తటస్థ వేదికల్లోనే ఆడనున్నాయి. 2008 నుంచి ఐపీఎల్ జరుగుతుండగా.. ఇప్పటి వరకూ 13 సీజన్లు ముగిశాయి. ఇందులో రోహిత్ శర్మ కెప్టెన్సీలో ముంబయి ఇండియన్స్ ఏకంగా ఐదు సార్లు టైటిల్ విజేతగా నిలిచింది. టోర్నీ చరిత్రలో మరే జట్టు కూడా ఇన్నిసార్లు టోర్నీ విజేతగా నిలవలేదు. ఐపీఎల్ 2020 సీజన్‌లోనూ ముంబయి ఇండియన్స్ విజేతగా నిలిచిన విషయం తెలిసిందే.
0 Comments